'അങ്കമാലി ഡയറീസി'ൽ പോർക്കിന്റെ ലൈവ് ഡബ്ബിങും

'ആമേനും' 'ഡബിൾ ബാരലി'നും ശേഷം ലിജോ ജോസ് പെല്ലിശ്ശേരി സംവിധാനം ചെയ്യുന്ന ചിത്രമാണ് 'അങ്കമാലി ഡ‍യറീസ്'. നടൻ ചെമ്പൻ വിനോദ് ജോസാണ് ചിത്രത്തിന് കഥയെഴുതുന്നത്. 86 കഥാപാത്രങ്ങളുള്ള ചിത്രത്തിന്‍റെ ഷൂട്ടിങ് ആരംഭിച്ചുകഴിഞ്ഞു. ചിത്രത്തിലെ ഒരു പ്രധാനകഥാപാത്രം പോർക്കാണ്. ചിത്രത്തിന്റെ പോസ്റ്ററിൽ വരെ ഒരു പോർക്കിൻ കുട്ടിയുടെ മുഖമുണ്ട്. 'കട്ട ലോക്കൽ' എന്നാണ് ചിത്രത്തിന്‍റെ ടാഗ്‍ലൈൻ. വിജയ് ബാബുവും സാന്ദ്ര തോമസും ചേർന്ന് ഫ്രൈഡേ ഫിലിം ഹൗസാണ് നിർമ്മാണം.

എന്നാൽ സിനിമ ദൃശ്യങ്ങളുടേത് മാത്രമല്ല, ശബ്ദത്തിന്റേതുകൂടിയാണ് എന്ന് എല്ലാവർക്കുമറിയാം. അതിനാൽ തന്നെ ബോളിവുഡിലും മോളിവുഡിലും ചുരുങ്ങിയകാലം കൊണ്ട് പേരുകേട്ട ശബ്ദ സംവിധായകൻ രംഗനാഥ് രവിയാണ് അങ്കമാലി ഡയറീസിന്റേയും ശബ്ദസംവിധാനം നിർവ്വഹിക്കുന്നത്. ചിത്രത്തിൽ പോർക്കിന്റെ ലൈവ് ശബ്ദം റിക്കാർഡ് ചെയ്യാൻ പോ‍ർക്കിൻ കൂട്ടി രംഗാനാഥ് നിൽക്കുന്ന ചിത്രം സോഷ്യൽ മീഡിയയിൽ പ്രചരിക്കുകയാണ്. എന്ന് നിന്റെ മൊയ്തീനിലൂടെ മഴയുടെ ശബ്ദസൗന്ദര്യം പ്രേക്ഷകരെ അനുഭവിപ്പിച്ച രംഗനാഥിന് മികച്ച സൗണ്ട് ഡിസൈനര്‍ക്കുള്ള സംസ്ഥാന പുരസ്കാരം ലഭിചിട്ടുമുണ്ട്.

live sound recording from a pig farm for a malayalam film.