വിജയ്-കീര്‍ത്തി ജോഡിയുടെ 'ഭൈരവ' നാളെ തിയേറ്ററുകളിലെത്തും

വിജയ് ചിത്രം ഭൈരവ പ്രദര്‍ശിപ്പിക്കാനുള്ള തീരുമാനവുമായി വിതരണക്കാര്‍ രംഗത്ത്. ഫെഡറേഷനില്‍ അംഗമല്ലാത്ത തീയറ്ററുകളിലും സര്‍ക്കാര്‍ തീയറ്ററുകളിലും ഭൈരവ പ്രദര്‍ശിപ്പിക്കും.

വന്‍ വിജയം നേടിയ തെറിക്ക് ശേഷം എത്തുന്ന വിജയ് ചിത്രമാണ് ഭൈരവ. തമിഴ്‍‍നാട്ടിലെ പൊങ്കല്‍ ആഘോഷത്തിന് മാറ്റുകൂട്ടിയാണ് ഭൈരവ തിയേറ്ററുകളില്‍ എത്തുന്നത്. എന്നാല്‍ കേരളത്തിൽ തമിഴ് സിനിമകള്‍ക്ക് വലിയ പ്രാധാന്യം നല്‍കാറുള്ള എ ക്ലാസ് തീയറ്റര്‍ ഉടമകള്‍ സമരം പ്രഖ്യാപിച്ചിരിക്കുകയാണ്. ഭൈരവയുടെ റിലീസ് ദിവസമായ വ്യാഴാഴ്ച തന്നെയാണ് എ ക്ലാസ് തീയറ്ററുകള്‍ അടച്ച് സമരം തുടങ്ങുന്നത്. എന്നാല്‍ തീയറ്റര്‍ സമരം ഭൈരവയുടെ റിലീസിനെ ബാധിക്കില്ലെന്ന് വിതരണക്കാര്‍ അറിയിക്കുന്നു. മള്‍ട്ടിപ്ലക്സുകളിലും സര്‍ക്കാരിന്‍റെ ഉടമസ്ഥതയിലുള്ള തീയറ്ററുകളിലും എക്സിബിറ്റേഴ്സ് ഫെഡറേഷന് കീഴിലുള്ള തീയറ്ററുകളിലും ഭൈരവ വിതരണം ചെയ്യാനാണ് തീരുമാനം.

ഡിസംബര്‍ 31 വരെയുള്ള കണക്കുകള്‍ പ്രകാരം 520 തീയറ്ററുകളാണ് കേരളത്തിലുള്ളത്. ഇതില്‍ 360 തീയറ്ററുകളും ഫിലിം എക്സിബിറ്റേഴ്സ് ഫെഡറേഷന് കീഴിലാണ്. ബാക്കിയുള്ള 160 തീയറ്ററുകളിലും മള്‍ട്ടിപ്ലക്സുകളിലും മറ്റു സിനിമകള്‍ റിലീസ് ചെയ്യും. എറണാകുളത്തെ പ്രമുഖ തീയറ്ററുകളായ പത്മ, ശ്രീധര്‍ തീയറ്ററുകളുടെ ഉടമയായ സുരേഷ് ഷേണായി ഭൈരവ വ്യാഴാഴ്ച മുതല്‍ പ്രദര്‍ശിപ്പിക്കുമെന്ന് അറിയിച്ചു. പത്മയില്‍ രണ്ട് സ്ക്രീനുകളിലാണ് പ്രദര്‍ശനം. മള്‍ട്ടിപ്ലക്സുകളിലും റെക്കോര്‍ഡ് ഷോകള്‍ ഉണ്ടാകും. തൃശൂരിലെ ശോഭാ സിറ്റിയിലെ മള്‍ട്ടിപ്ലക്സില്‍ മാത്രം ആദ്യദിനം 16 ഷോ ഉണ്ട്.


Vijay-Keerthy film Bhairava is all set to Release

Vijay-Keerthy Suresh's Tamil film Bhairava is all set to Release in Kerala Theatres from Tomorrow