മോഹന്‍ലാല്‍ ചിത്രത്തിനായി പെരുമ്പാവൂരില്‍ ഇന്ത്യാ-പാക് അതിര്‍ത്തി ഒരുങ്ങുന്നു

പെരുമ്പാവൂര്‍: മോഹന്‍ലാല്‍ ചിത്രത്തിനായി പെരുമ്പാവൂരില്‍ ഇന്ത്യാ-പാക് അതിര്‍ത്തി ഒരുങ്ങുന്നെന്ന് റിപ്പോര്‍ട്ട്. പെരുമ്പാവൂര്‍ നഗരത്തിന് സമീപം നാല്‍പതേക്കറോളമുള്ള നിലം നികത്തിയെടുത്ത സ്ഥലമാണ് മോഹന്‍ലാല്‍-മേജര്‍ രവി ചിത്രത്തിനു വേണ്ടി അതിര്‍ത്തിയാവുന്നത്. റെഡ് റോസ് ക്രിയേഷന്‍സിന്‍റെ ബാനറില്‍ മേജര്‍ രവി തിരക്കഥയെഴുതി സംവിധാനം ചെയ്യുന്ന ‘1971: ബിയോണ്ട് ബോര്‍ഡേഴ്‌സ്’ എന്ന സിനിമയുടെ ഷൂട്ടിങ്ങാണ് പെരുമ്പാവൂരില്‍ തുടങ്ങിയതെന്ന് മാതൃഭൂമി റിപ്പോര്‍ട്ട് ചെയ്തു.

ഉത്തരേന്ത്യന്‍ ഗ്രാമത്തിന്‍റേതു പോലെയുള്ള വിജനതയും ചുറ്റുപാടുകളുമുള്ളതിനാലാണ് ഇവിടം ലൊക്കേഷനായി തെരഞ്ഞെടുത്തത്. നികത്തിയെടുത്ത 40 ഏക്കര്‍ വിസ്തൃതിയുള്ള പാടശേഖരം തരിശായി കിടക്കുകയാണ്. 1971-ലെ ഇന്ത്യ-പാക് യുദ്ധം പ്രമേയമാക്കുന്ന സിനിമയുടെ ഷൂട്ടിങ്ങിനു വേണ്ടി രാജ്യാതിര്‍ത്തിയിലുള്ളതു പോലെ ഇരുമ്പുവേലികളും ട്രഞ്ചുകളും ഇവിടെ സെറ്റിട്ടിരിക്കുകയാണ്.

ഇന്നലെ രാവിലെ സൈനിക വേഷത്തിലാണ് മോഹന്‍ലാല്‍ ലൊക്കേഷനിലെത്തിയത്. ചിത്രത്തില്‍ പ്രധാന കഥാപാത്രമായ മേജര്‍ മഹാദേവനായും അച്ഛന്‍ മേജര്‍ സഹദേവനായും ഇരട്ട റോളുകളിലാണ് മോഹന്‍ലാല്‍ അഭിനയിക്കുന്നത്. രാത്രിയും പകലും ഇവിടെ ഷൂട്ടിങ്ങുണ്ടാകും. കശ്‍‍മീര്‍, പഞ്ചാബ്, രാജസ്ഥാന്‍, യുഗാണ്‍ഡ എന്നിവയാണ് സിനിമയുടെ പ്രധാന ലൊക്കേഷനുകള്‍. മോഹന്‍ലാല്‍ മേജര്‍ മഹാദേവനായി അഭിനയിച്ച കീര്‍ത്തിചക്ര (2006), കുരുക്ഷേത്ര (2008), കാണ്ടഹാര്‍ (2010) എന്നീ സിനിമകളുടെ തുടര്‍ച്ചയാണ് പുതിയ ചിത്രം.

Setting India Pak Border at Perumbavur For Mohanlal's New Movie

Mohanlal's new Movie's Shooting Process is going on. for that crew is setting Indo-Pak Border at Perumbavoor for the Movie