പാട്ടുകളിറക്കാൻ 'ബാഹുബലി' ടീം ഞായറാഴ്ച കൊച്ചിയിൽ

കൊച്ചി : കട്ടപ്പ ബാഹുബലിയെ കൊന്നതെന്തിനെന്നറിയാൻ ഇനി ആറുദിനം കൂടി. 'ബാഹുബലി 2 ദ കൺക്ലൂഷൻ ' ഏപ്രിൽ 28 ന് പുറത്തിറങ്ങും. 4 വർഷമാണ് സിനിമയുടെ ചിത്രീകരണത്തിനായി എടുത്തത്. മറ്റൊരു ചിത്രത്തിനും ഡേറ്റ് നൽകാതെ ബാഹുബലിക്കു വേണ്ടി മാത്രമായി നായക നടനായ പ്രഭാസ് നാല് വർഷമാണ് മാറ്റി വച്ചത്. 2013ൽ പുറത്തിറങ്ങിയ മിർച്ചി ആയിരുന്നു പ്രഭാസ് നായകനായി അവസാനം ഇറങ്ങിയ ചിത്രം. അവിടുന്നിങ്ങോട്ട് ബാഹുബലിക്കൊപ്പം ആയിരുന്നു പ്രഭാസ്.

ബാഹുബലിയുടെ രണ്ടാം ഭാഗം തീയറ്ററുകളിൽ എത്തുന്നതിന് മുന്നോടിയായി ബാഹുബലി ടീം കേരളത്തിൽ എത്തുകയാണ്. 23 നാണ് പരിപാടി. നായകനായ പ്രഭാസ് കട്ടപ്പയായി അഭിനയിച്ച സത്യരാജ്, സംവിധായകൻ രാജമൗലി, നായിക അനുഷ്‌ക ഷെട്ടി, നാസർ എന്നിവരാണ് പ്രമോഷന്റെ ഭാഗമായി കൊച്ചി ക്രൗൺ പ്ലാസ ഹോട്ടലിൽ എത്തുന്നത്. ചിത്രത്തിന്റെ ഓഡിയോ ലോഞ്ച് കൊച്ചിയിൽ നടത്തുമെന്നാണറിയുന്നത്.

പ്രഭാസിനെപ്പോലെ തിളങ്ങി നിൽക്കുന്ന നടൻ ഇത്രയും സമയം ഒരു സിനിമക്ക് വേണ്ടി മാത്രം മാറ്റി വക്കുന്നതും തന്നിൽ അർപ്പിച്ച വിശ്വാസവുമാണ് ബാഹുബലി ഉണ്ടാകാൻ കാരണം എന്നാണ് രാജമൗലിയുടെ പക്ഷം. കണ്ണഞ്ചിപ്പിക്കുന്ന ദൃശ്യാനുഭവമായിരിക്കും ബാഹുബലി രണ്ടിൽ പ്രേക്ഷകരെ കാത്തിരിക്കുന്നത്. ബ്രഹ്മാണ്ഡ സെറ്റും അതിശയിപ്പിക്കുന്ന ആക്ഷൻ രംഗങ്ങളും കോണ്ട് ആരാധകരെ കൈയ്യിലെടുത്ത സിനിമയുടെ ട്രെയിലർ നൽകുന്ന സൂചന ബാഹുബലി 2 ദ കൺക്ലൂഷൻ പ്രേക്ഷകർക്ക് നവ്യാനുഭവമായിരിക്കും എന്നാണ്.


Baahubali 2 team to visit Kochi on April 23
Baahubali 2 team to visit Kerala for promotion of blockbuster ... Sathyaraj, Rajamouli, and many others will be coming to Kochi on Sunday.