മെർസൽ: വിവാദങ്ങൾക്ക് മറുപടിയുമായി വിജയുടെ പിതാവ്

ചെന്നൈ: മെർസൽ സിനിമയുമായി ബന്ധപ്പെട്ട വിവാദങ്ങൾക്ക് മറുപടിയുമായി വിജയുടെ പിതാവ് എസ്.എ ചന്ദ്രശേഖർ. "ജാതിയും മതവും ഇല്ലാതെയാണ് അവനെ വളർത്തിയത്. സ്കൂൾ രേഖകളിൽ അവൻെറ പേര് ജോസഫ് വിജയ് എന്ന് തന്നെയാണ്. ഇനി അവൻ ക്രിസ്ത്യാനിയാണെങ്കിൽ രാഷ്ട്രീയ നേതാക്കൾക്ക് എന്താണ് പ്രശ്നം," ഒരു ദേശീയ മാധ്യമത്തിന് നൽകിയ അഭിമുഖത്തിൽ അദ്ദേഹം പറഞ്ഞു.

വിജയ് രാഷ്ട്രീയത്തിൽ ഇറങ്ങിയേക്കാം എന്ന സൂചനയും ചന്ദ്രശേഖർ നൽകി. ഒരുപാട് ആരാധകരുള്ള നടൻമാർക്ക് സമൂഹത്തിൽ ഒരുപാട് കാര്യങ്ങൾ ചെയ്യാനുണ്ടാവുമെന്ന് അദ്ദേഹം പറഞ്ഞു. ജനങ്ങളെ സേവിക്കുക എന്നതും അവരുടെ കടമയാണ് അദ്ദേഹം കൂട്ടിച്ചേർത്തു.

മെർസൽ വിഷയത്തിൽ നിലപാടെടുത്ത രാഷ്ട്രീയ പാർട്ടികളോടും രാഹുൽ ഗാന്ധി അടക്കമുള്ള നേതാക്കളോടും അദ്ദേഹം നന്ദി പറഞ്ഞു. "അവർ ന്യായത്തിൻെറ പക്ഷത്താണ് നിന്നത്. അവർ ഭരണത്തിൽ എത്തിയാലും ഇത്തരത്തിൽ ശക്തമായ നിലപാട് തന്നെ പ്രതീക്ഷിക്കുന്നു." വിജയുടെ പിതാവ് പറഞ്ഞു.

സംവിധായകനും നിർമ്മാതാവുമായ ചന്ദ്രശേഖർ തന്നെയാണ് വിജയിനെ തെന്നിന്ത്യൻ സിനിമാലോകത്തിന് പരിചയപ്പെടുത്തിയത്.

Mersal row: Vijay's father S A Chandrasekar responds

Actor Vijay's father S A Chandrasekar thanked the people and political leaders whoever supported Mersal movie.