തേപ്പുപടങ്ങളുടെ കാലത്ത് വേറിട്ട ഒരു ഹ്രസ്വചിത്രം

കൈയ്യുകണക്കുമില്ലാതെ തേപ്പുപടങ്ങളിറങ്ങുന്ന കാലമാണിത്. കാമുകി കാമുകനെ കാമുകൻ കാമുകിയെ ഒക്കെ തലങ്ങും വിലങ്ങും തേക്കുന്ന ചിത്രങ്ങളൊരുപാടുണ്ട് ഇപ്പോൾ യൂട്യൂബ് കൊട്ടകയിൽ. ഇതിനിടയിൽ ഭംഗിയുള്ളതെന്തും അതേ പോലെ നിൽക്കട്ടെ എന്നൊരു സന്ദേശം പറഞ്ഞുകൊണ്ട് വേറിട്ട് നിൽക്കുന്നൊരു ഹ്രസ്വചിത്രം. ''എന്‍റെ ഹൃദയത്തിന്‍റെ വടക്ക് കിഴക്കേ അറ്റത്ത്'' എന്നു പേരിട്ടിരിക്കുന്ന ഈ ഹ്രസ്വ ചിത്രം വ്യത്യസ്തമാകുന്നത് ഈയൊരു സന്ദേശം പകരുന്ന പ്രസാദാത്മകത കൊണ്ടാണ്.

ഏത് ജീവിതാവസ്ഥ സ്വീകരിക്കാനും പുരുഷനും സ്ത്രീക്കും അവകാശമുണ്ട്. പക്ഷേ അതിനായി ഒരാൾ സ്വന്തമായി കൈക്കൊള്ളേണ്ട ചില നിലപാടുകളുണ്ട്. മനസ്സിനോട് നടത്തേണ്ട ചില മൽപിടുത്തങ്ങളുണ്ട്. മോഹിപ്പിക്കുന്ന ചില സൗന്ദര്യങ്ങളോട് സ്നേഹപൂർവ്വമെടുക്കുന്ന ചില വിരക്തികളുണ്ട്. അത്തരത്തിലൊരാളുടെ മാനസിക വ്യാപരങ്ങളിലൂടെയുള്ള സഞ്ചാരമാണ് പേരിൽതന്നെ പുതുമകൊണ്ടുവന്നിരിക്കുന്ന ഈ കുഞ്ഞുചിത്രം. ബന്ധങ്ങളുടെ മനോഹാരിതയാണ് ചിത്രം പ്രേക്ഷകർക്ക് പകരുന്നത്.

24 മിനിറ്റാണ് ചിത്രത്തിന്‍റെ ദൈർഘ്യം. ചില പരസ്യചിത്രങ്ങളൊരുക്കി ശ്രദ്ധേയനായ അനൂപ് നാരായണനാണ് കഥയെഴുതി സംവിധാനം നിർവ്വഹിച്ചിരിക്കുന്നത്. ഛായാഗ്രഹണം പ്രസാദ് യോഗി നിർവ്വഹിച്ചിരിക്കുന്നു. മത്തായി ബിബിൻ, വിഷ്ണു വിദ്യാധരൻ, അനീഷ ഉമ്മർ, ആനന്ദ് റോഷൻ, എം.ബി മനോജ്, സംഗീത് സോമൻ തുടങ്ങിയവരാണ് ചിത്രത്തിൽ അഭിനയിച്ചിരിക്കുന്നത്. സംഗീതം ജോയൽ ജോൺസും സൗണ്ട് ഇഫക്ട് ജിബിൻ ജോർജ്ജും ഓഡിയോ മിക്സിങ്ങും മാസ്റ്ററിങ്ങും ഹാപ്പി ജോസും നിർവ്വഹിച്ചിരിക്കുന്നു. ചിത്രം കാണാം...


short film At the North East Corner of my Heart

short film At the North East Corner of my Heart short film review.