പ്രഗൽഭ വയലിനിസ്‌റ്റ് ജോ ഐസക്കിന്റെയും ഗായിക എമിൽഡയുടെയും മൂത്ത മകനാണ് എമിൽ. സംഗീത സംവിധായകരായ ജോബും ജോർജും ഗായകരായ സി.ഒ.ആന്റോയും സീറോ ബാബുവുമൊക്കെ ഉൾപ്പെട്ട കൊച്ചിയിലെ ആസാദ് ക്ലബിൽനിന്ന് കടമെടുത്ത ഗിറ്റാറിൽ തുടങ്ങിയതാണ് എമിലിന്റെ യാത്ര. 1965ൽ സ്വന്തമായി ഗാനമേള ട്രൂപ്പ് ആരംഭിച്ച യേശുദാസ് എമിലിനെ ഗിറ്റാറിസ്‌റ്റാക്കി. മദ്രാസിൽ യേശുദാസിന്റെ വീട്ടിൽ താമസിച്ച് പ്രശസ്‌ത സംഗീതജ്‌ഞർക്കൊപ്പം പല റിക്കാർഡിങ്ങുകൾക്കും ഗിറ്റാർ വായിച്ചിട്ടുണ്ട്. ബാബുരാജ്, ചിദംബരനാഥ്, ദേവരാജൻ തുടങ്ങി പല പ്രമുഖരോടൊത്ത് ജോലി ചെയ്തിട്ടുമുണ്ട്.
1968ൽ സ്വന്തം ട്രൂപ്പായ എലീറ്റ് എയ്‌സസ് രൂപീകരിച്ചു. ദേവാലയസംഗീത ശാഖകളിലും സജീവമായി. മൈക്കിളച്ചന്റേയും മനയ്‌ക്കലച്ചന്റേയും നേതൃത്വത്തിൽ നടന്നിരുന്ന ഭക്‌തിഗാനമേളകളുടെ റെക്കോർഡിങ്ങിന് മുന്നിൽനിന്നു.1970 മുതൽ മൂന്നുവർഷം കലാഭവൻ നടത്തിയ മ്യൂസിക് നൈറ്റിൽ അറുപതോളം സംഗീതോപകരണങ്ങളുടെ അകമ്പടിയോടെ ഓർക്കസ്‌ട്ര കണ്ടക്‌ട് ചെയ്ത് എമിൽ ചരിത്രം സൃഷ്ടിച്ചു. ജാനി ഉതുപ്പുമായുള്ള വിവാഹശേഷം ഉഷ ഉതുപ്പ് കൊച്ചിയുമായി ബന്ധം സ്‌ഥാപിച്ചത് എമിലിന്റെ സംഗീതത്തിന് ചിറകുകൾ നൽകി. 1973ൽ കോട്ടയത്ത് ഫൈൻ ആർട്‌സ് സൊസൈറ്റിയുടെ പരിപാടിക്കെത്തിയ ഉഷ എലീറ്റ് എയ്‌സസിലെ ടീമംഗങ്ങളെ ഒപ്പംചേർത്തു. ഉഷയുടെ ശുപാർശയിൽ എമിൽ കൊൽക്കത്തയിലെ ട്രിങ്കാസ് ഹോട്ടലിലും ബോംബെയിലെ ഷെറട്ടൺ ഹോട്ടലിലും ഗിറ്റാറിസ്‌റ്റായി.
ഉഷ ഉതുപ്പിന്റെ പല ആൽബങ്ങളിലും എമിലിന്റെ സംഗീതവും ഉൾച്ചേർത്തിരുന്നു.
1982 മുതൽ ഉഷ കൊൽക്കത്തയിൽ സ്‌ഥാപിച്ച സ്‌റ്റുഡിയോ വൈബ്രേഷൻസിലെ ചീഫ് സൗണ്ട് റെക്കോർഡിസ്‌റ്റായി. കൊച്ചിയിൽ നിന്ന് കൊൽക്കത്തയിലേക്ക് ഭാര്യ ഹെലനൊപ്പം ചേക്കേറി. മക്കൾ രണ്ടുപേരും വിദേശത്താണ്. എമിലിന് പത്തു സഹോദരങ്ങളാണ്. അതിൽ റെക്‌സ്, യൂജിൻ, ആന്റണി, എഫ്രി, ഈലോയ്, എൽഡ്രിജ് എന്നിവർ സംഗീതവഴിയിൽ തന്നെയാണ്.
വാര്‍ത്തയ്ക്ക് കടപ്പാട്-മനോരമ, മാതൃഭൂമി
Mobile AppDownload Get Updated News