സുരാജിന്‍റെ 'കുട്ടൻപിള്ളയുടെ ശിവരാത്രി' പതിനൊന്നിനെത്തും

സുരാജ് വെഞ്ഞാറമ്മൂട് നായകനാകുന്ന 'കുട്ടൻപിള്ളയുടെ ശിവരാത്രി' ഈ മാസം പതിനൊന്നിന് തിയേറ്ററുകളിലെത്തും. ആദ്യം നാളെയാണ് റിലീസ് തീയതിയായി നിശ്ചയിച്ചിരുന്നതെങ്കിലും കഴിഞ്ഞ ദിവസത്തോടെ റിലീസ് തീയ്യതി മാറ്റുകയായിരുന്നു. നവാഗതനായ ജീൻ മർക്കോസ് തിരക്കഥ എഴുതി സംവിധാനം ചെയ്യുന്ന ചിത്രമാണിത്.

ചിത്രത്തിൽ സുരാജ് വെഞ്ഞാറമൂട് പോലീസ് കോൺസ്റ്റബിൾ കുട്ടൻപിള്ളയായാണെത്തുന്നത്. ശിവരാത്രി കാലത്ത് കുട്ടൻപിള്ളയുടെ വീട്ടിൽ നടക്കുന്ന കുടുംബ സംഗമവും തുടർന്ന് ഉണ്ടാകുന്ന രസകരമായ സംഭവങ്ങളും കോർത്തിണക്കിയാണ് കഥ പറയുന്നത്. ഈ ചിത്രത്തിന് വേണ്ടി സുരാജ് പാടിയ ഗാനം ഇതിനോടകം തന്നെ ഹിറ്റ് ചാർട്ടിൽ ഇടം നേടി കഴിഞ്ഞു.

മിഥുൻ രമേശ്, ബിജു സോപാനം, കൊച്ചുപ്രേമൻ, ശ്രീകാന്ത് മുരളി, സിൻഡ്ര 'അർജുൻ, ശ്രുതി ,പ്രവീണ ,ആശാ ശ്രീകാന്ത് എന്നിവരും മുഖ്യ വേശങ്ങൾ കൈകാര്യം ചെയ്തിരിക്കുന്നു. ജോസ് ലറ്റാണ് സംഭാഷണം ഒരുക്കിയിരിക്കുന്നത്. അൻവർ അലി രചിച്ച ഗാനങ്ങൾക്ക് സംഗീതം പകര്‍ന്നിരിക്കുന്നത് ഗായിക കൂടിയായ സയനോര ഫിലിപ്പാണ്. സയനോരയുടെ ആദ്യ സംഗീത സംവിധാന സംരംഭമാണ് ഈ ചിത്രം. ഫാസിൽ നാസറാണ് ക്യാമറ കൈകാര്യം ചെയ്തിരിക്കുന്നത്.