യേശുദാസിനും ജയരാജിനും എതിരെ ആഞ്ഞടിച്ച്‌ ഭാഗ്യലക്ഷ്മി

ന്യൂഡല്‍ഹി : ഭൂരിപക്ഷം പുരസ്‌കാര ജേതാക്കളും വിട്ടുനിന്ന നിറം കെട്ട ചടങ്ങില്‍ ദേശീയ ചലച്ചിത്ര അവാര്‍ഡുകള്‍ വിതരണം ചെയ്തു. രാഷ്ട്രപതി പുരസ്‌കാരം നല്‍കാത്തതില്‍ പ്രതിഷേധിച്ച്‌ 68 പേരാണ് ചടങ്ങു ബഹിഷ്‌കരിച്ചത്. മലയാളത്തില്‍നിന്ന് ഗായകന്‍ യേശുദാസും സംവിധായകന്‍ ജയരാജും മാത്രമാണ് ചടങ്ങില്‍ പങ്കെടുത്തത്. ചടങ്ങ് ബഹിഷ്‌കരിക്കുന്നതിനു താല്പര്യമില്ലെന്നും വിവേചനത്തില്‍ പ്രതിഷേധിച്ചാണ് നിവേദനത്തില്‍ ഒപ്പുവച്ചതെന്നും നിവേദനം നല്കിയതിനെ പിന്തുണയ്ക്കുന്നുവെന്നും യേശുദാസ് വ്യക്തമാക്കിയിരുന്നു.

യേശുദാസിന്റെയും ജയരാജിന്റെയും നിലപാടിനെ വിമര്‍ശിച്ച്‌ ഭാഗ്യലക്ഷ്മി രംഗത്തെത്തി. എല്ലാ പ്രതിഷേധത്തിലും ചതിയും വഞ്ചനയും ഉണ്ടാകുമെന്നാണ് ഭാഗ്യലക്ഷ്മി പറഞ്ഞത്. നാളത്തെ തലമുറയ്ക്ക് വേണ്ടിയുള്ള പോരാട്ടമാണിത്. എന്തുകൊണ്ട് രാഷ്ട്രപതി അവാര്‍ഡ് നല്‍കാന്‍ വിസമ്മതിക്കുന്നുവെന്ന് അധികൃതര്‍ വ്യക്തമാക്കിയിട്ടില്ലെന്നും ഭാഗ്യലക്ഷ്മി പറഞ്ഞു. അവാര്‍ഡ് തുക തിരികെ നല്‍കാന്‍ ജേതാക്കള്‍ ആലോചിക്കുന്നുണ്ടെന്നും ഭാഗ്യലക്ഷ്മി പറഞ്ഞു. അതേസമയം, ചടങ്ങ് ബഹിഷ്‌കരിച്ച അവാര്‍ഡ് ജേതാക്കള്‍ വേദിക്ക് പുറത്ത് പ്രതിഷേധിച്ചു.