താന്‍ നിയമം പാലിക്കുന്ന ഇന്ത്യന്‍ പൗരൻ: ബച്ചൻ

മുംബൈ: താന്‍ നിയമം പാലിക്കുന്ന ഇന്ത്യന്‍ പൗരനാണെന്നും ആദായ നികുതി വകുപ്പിന്‍റെ അന്വേഷണത്തോട് പൂർണമായി സഹകരിക്കുന്നുണ്ടെന്നും ബോളിവുഡ് താരം അമിതാഭ് ബച്ചന്‍. നിയമത്തെ അംഗീകരിക്കുന്ന ഒരിന്ത്യന്‍ പൗരനാണ് താൻ. കഴിഞ്ഞ ആറേഴു വര്‍ഷമായി ആദായ നികുതി വകുപ്പും എന്‍ഫോഴ്‌സ്‌മെന്റ് ഡയറക്ടറേറ്റും അന്വേഷിക്കുന്ന കാര്യങ്ങളാണ് വാർത്തയിൽ വന്നത്. അവരില്‍ നിന്നുള്ള നോട്ടീസുകള്‍ക്കും ചോദ്യങ്ങള്‍ക്കും താന്‍ കൃത്യമായി മറുപടി നല്‍കിയിട്ടുണ്ടെന്നും ബച്ചൻ പറഞ്ഞു.

പനാമയില്‍ തനിക്ക് കമ്പനികളുണ്ടെന്ന വാര്‍ത്ത നിഷേധിച്ച ബച്ചൻ റിപ്പോര്‍ട്ടില്‍ പറയുന്ന നാല് കമ്പനികളുടെ ബോർഡ് ഡയറക്ടറായി താന്‍ പ്രവര്‍ത്തിച്ചിട്ടില്ലെന്നും പറഞ്ഞു. സംഭവത്തിൽ അന്വേഷണം പ്രഖ്യാപിച്ചതില്‍ സന്തോഷമുണ്ട്. എന്നാൽ ഈ നാല് കമ്പനികളുമായി ബന്ധപ്പെട്ട് എങ്ങനെ തന്റെ പേര് വന്നുവെന്നറിയാൻ താൽപ്പര്യമുണ്ടെന്നും ബിഗ് ബി വ്യക്തമാക്കി. കള്ളപ്പണമുണ്ടെന്ന പനാമാ പേപ്പേഴ്‌സ് വെളിപ്പെടുത്തലുകള്‍ക്ക് പിന്നാലെയാണ് ബച്ചന്‍റെ പ്രതികരണം