പുലിമുരുകന്‍ കുതിപ്പ്; ദൃശ്യ’ത്തിനടുത്തെത്തി

അറുപത് കോടി രൂപ കളക്ഷനുമായി മോഹന്‍ലാല്‍ ചിത്രം 'പുലിമുരുകന്‍' കുതിക്കുന്നു. ആദ്യ മൂന്ന് ദിവസങ്ങളിലും ചിത്രം 4 കോടിക്ക് മുകളില്‍ കളക്ട് ചെയ്തിരുന്നു. ചിത്രം പുറത്തിറങ്ങി രണ്ടാഴ്ച കഴിയുമ്പോഴേക്കും ഏകദേശം അറുപത് കോടി രൂപയാണ് ചിത്രം വാരിക്കൂട്ടിയിരിക്കുന്നത്. മൂന്ന് ദിവസത്തെ കളക്ഷനിലൂടെ മാത്രം അതിവേഗം 10 കോടി പിന്നിടുന്ന മലയാളചിത്രം എന്ന റെക്കോര്‍ഡ് സ്വന്തമാക്കിയിരുന്നു 'പുലിമുരുകന്‍'.

വേഗത്തില്‍ 25 കോടി പിന്നിടുന്ന മലയാളചിത്രം എന്ന റെക്കോര്‍ഡായിരുന്നു അടുത്തത്. അടുത്തയാഴ്ചയാണ് പുലിമുരുകന്‍ വിദേശത്ത് റിലീസ് ചെയ്യുന്നത്. വിദേശ റിലീസുകള്‍ കൂടി പരിഗണിക്കുമ്പോള്‍ ആദ്യമായി 100 കോടി കളക്ഷന്‍ നേടുന്ന മലയാളചിത്രമാവാനുള്ള വലിയ സാധ്യതയാണ് പുലിമുരുകന് മുന്നിലുള്ളത്.

ഓവര്‍സീസ്, സാറ്റലൈറ്റ് റൈറ്റുകള്‍, ഓഡിയോ, വീഡിയോ റൈറ്റ് എന്നീ ഇനത്തിലും ചിത്രം 15 കോടി രൂപയോളം നേടിയെന്നാണ് റിപ്പോര്‍ട്ടുകള്‍. മലയാളത്തിലെ എക്കാലത്തേയും കളക്ഷന്‍ റെക്കോര്‍ഡായിരുന്ന ദൃശ്യത്തിന്റെ 70 കോടിയെന്ന അതിരിനേയും പുലിമുരുകന്‍ ഭേദിക്കുമെന്ന് തന്നെയാണ് കണക്കൂകൂട്ടല്‍.



English Summary: Pulimurugan Movie Second Week Collection. The film's collection break record of Drishyam