പി.സിയും ബിനീഷും ഒന്നിക്കുന്ന 'ഒരു മഹാസംഭവം' വരുന്നു

വിജയ് നായകനായ 'തെരി'യിൽ മലയാളി വില്ലനായി തിളങ്ങിയ തോപ്പുംപടിക്കാരനായ ബിനീഷ് ബാസ്റ്റിൻ പി.സി ജോർജ്ജ് എംഎൽഎയോടൊപ്പം നായകനായി തിളങ്ങാനൊരുങ്ങുന്നു. 'ഒരു മഹാസംഭവം' എന്ന ചിത്രത്തിലൂടെയാണ് ബിനീഷിന്റെ നായകനായുള്ള അരങ്ങേറ്റം. വൺ മിസ്കോൾ, ലാസ്റ്റ് ബസ് എന്നീ ചിത്രങ്ങൾ സംവിധാനം ചെയ്ത ശ്രീജിത്ത് മഹാദേവനാണ് ഒരു മഹാസംഭവം സംവിധാനം ചെയ്യുന്നത്. അസീസ്, അലി റഹ്മാൻ എന്നിവരും പ്രധാന വേഷത്തിലെത്തുന്നു. മധു, കൊച്ചുപ്രേമൻ, ഇന്ദ്രൻസ്, കല്യാണി തുടങ്ങിയവരാണു മറ്റു താരങ്ങൾ.

തിരുവനന്തപുരം ചെങ്കൽചൂളയിൽ ചിത്രീകരണം പുരോഗമിക്കുന്ന സിനിമയി ൽ പി.സി.ജോർജ് എംഎൽഎ പി.സി. ജോർജായി തന്നെ അഭിനയിക്കുന്നു എന്നതാണ് പ്രത്യേകത. വാസു എന്ന കഥാപാത്രത്തെയാണ് ഹ്യൂമറിന് ഏറെ പ്രാധാന്യമുള്ള ഈ ചിത്രത്തിൽ ബിനീഷ് അവതരിപ്പിക്കുന്നത്.

വിജയ് അവതരിപ്പിക്കുന്ന ജോസഫ് കുരുവിള എന്ന കഥാപാത്രത്തിന്റെ കേരളത്തിലുള്ള രംഗങ്ങളിലെ പ്രേം എന്ന മലയാളിയായ വില്ലനായാണ് ബിനീഷ് തെരിയിൽ അഭിനയിച്ചത്. 2005ൽ മിസ്റ്റർ എറണാകുളം ആകുന്നവർക്ക് റാഫി മെക്കാർട്ടിന്റെ പാണ്ടിപ്പട എന്ന സിനിമയിൽ അഭിനയിക്കാൻ അവസരമുണ്ടായിരുന്നു. അങ്ങനെയാണ് അഭിനയരംഗത്തേക്ക് ബാസ്റ്റിന്റെ ആദ്യ ചുവടുവയ്പ്.

ചെറിയ ഗുണ്ടയായി പാണ്ടിപ്പടയിലൂടെ വെള്ളിത്തിരയിലെത്തിയ ബിനീഷ് ബാസ്റ്റിൻ പോക്കിരിരാജ, പാസഞ്ചർ, അണ്ണൻതമ്പി, എയ്ഞ്ചൽ ജോൺ, ഹോളിവുഡ് ചിത്രമായ ഡാം 999, പാവാട, ദം, ആക്ഷൻ ഹീറോ ബിജു, കട്ടപ്പനയിലെ ഋത്വിക് റോഷൻ തുടങ്ങി എൺപതോളം ചിത്രങ്ങളിൽ ഗുണ്ടയായി അഭിനയിച്ചു. പിന്നീടാണ് തെരിയിലെത്തിയത്.

'തെരി' എന്ന സിനിമയാണു തനിക്കു ഭാഗ്യം കൊണ്ടുവന്നതെന്നു ബിനീഷ് പറയുന്നു. പത്തു വർഷത്തിലേറെയായി നടത്തുന്ന കഷ്‌ടപ്പാടിനു ഫലം കണ്ടതിപ്പോഴാണെന്നും ബിനീഷ് കൂട്ടിച്ചേർത്തു. ഫഹദ് നായകനാകുന്ന പുതിയ ചിത്രം 'റോൾ മോഡൽസി'ലും നല്ലൊരു വേഷം ബിനീഷിനുണ്ട്. കൂടാതെ 'തെരി'യുടെ ഹിന്ദി പതിപ്പിലും ബിനീഷ് അഭിനയിക്കാനൊരുങ്ങുകയാണ്.

bineesh bastin shares screen space with pc george.