ജ്വല്ലറി ഉദ്ഘാടനത്തിനെത്തിയ നടിയെ കടന്നു പിടിക്കാൻ ശ്രമം

മുക്കത്ത് ജ്വല്ലറിയുടെ ഉദ്ഘാടന ചടങ്ങിനിടെ യുവനടിയെ കടന്നു പിടിക്കാന്‍ ശ്രമം. കോഴിക്കോട് മുക്കത്ത് കെജിഎം ഗോള്‍ഡ് ജ്വല്ലറിയുടെ ഉദ്ഘാടന ചടങ്ങിനിടെയാണ് സംഭവം. തിങ്കളാഴ്ച വൈകീട്ട് നാലു മണിക്കായിരുന്നു ജ്വല്ലറിയുടെ ഉദ്ഘാടനം. ചടങ്ങില്‍ നടി നിക്കി ഗൽറാണി എത്തുമെന്നായിരുന്നു ആദ്യം പറഞ്ഞിരുന്നത്. എന്നാല്‍, സമയക്രമത്തില്‍ മാറ്റം വന്നതോടെ അവര്‍ ഒഴിവായി. ഇതേ തുടര്‍ന്നാണ് മലയാളത്തിലെ യുവനടി അനു സിത്താര ഉദ്ഘാടനത്തിനായി എത്തിയത്.

ചടങ്ങില്‍ നടി എത്തിയതോടെ തിക്കും തിരക്കും ശക്തമായി. ഇതിനിടെ ഒരു യുവാവ് നടിയെ കടന്നു പിടിച്ചു. നടി ബഹളം വെക്കുമെന്ന് തോന്നിയതോടെ ഇയാള്‍ സംഭവസ്ഥലത്തു നിന്നും രക്ഷപ്പെടുകയും ചെയ്‌തു. സിസിടിവി ദൃശ്യങ്ങളില്‍ സംഭവം പതിഞ്ഞിട്ടുണ്ട്. ഇത് പ്രകാരം കുറ്റക്കാര്‍ക്കെതിരെ പരാതി കൊടുക്കാനാണ് നടിയുടെ തീരുമാനമെന്നാണ് ജ്വല്ലറി ഉടമകൾ വ്യക്തമാക്കിയിരിക്കുന്നത്. അതേസമയം, മതിയായ സുരക്ഷയൊരുക്കാന്‍ അധികൃതര്‍ക്ക് കഴിയാത്തതാണ് ഇത്തരമൊരു സംഭവത്തിന് കാരണമായതെന്ന ആരോപണവും ശക്തമാണ്.