'മോഹൻലാൽ' വിഷുവിന് തന്നെ തീയറ്ററുകളിലെത്തും

തൃശൂർ: മഞ്ജു വാരിയർ നായികയായി സാജിദ് യഹിയ സംവിധാനം ചെയ്യുന്ന മോഹൻലാൽ 14ന് തന്നെ തീയറ്ററിൽ എത്തും. 'മോഹൻലാലിനെ എനിക്കിപ്പോൾ പേടിയാണ്' എന്ന തന്‍റെ കഥയെ ആസ്പദമാക്കിയാണ് സിനിമ എടുത്തിരിക്കുന്നതെന്ന തിരക്കഥാകൃത്ത് കലവൂർ രവികുമാറിന്‍റെ പരാതിയെ തുടർന്ന് ചിത്രത്തിന്‍റെ റിലീസ് തടഞ്ഞിരുന്നു. തൃശൂർ ജില്ലാ കോടതിയാണ് ചിത്രം സ്റ്റേ ചെയ്തിരുന്നത്. എന്നാൽ, അണിയറപ്രവർത്തകർ തന്‍റെ കഥക്ക് പ്രതിഫലമായി അഞ്ച് ലക്ഷം രൂപ നൽകാമെന്ന് ഉറപ്പ് പറഞ്ഞതായി കലവൂർ രവികുമാർ മാധ്യമങ്ങളോട് അറിയിച്ചു.

'മോഹൻലാലി'ന്‍റെ അണിയറപ്രവർത്തകരും കലവൂർ രവികുമാറും തമ്മിലുള്ള പ്രശ്നം ഒത്തുതീർപ്പായതോടെയാണ് ചിത്രം 14 ന് തന്നെ റിലീസ് ചെയ്യാൻ തീരുമാനമായത്. മോഹൻലാൽ ആരാധികയായ ഒരു ഭാര്യ കുടുംബത്തിലുണ്ടാക്കുന്ന പ്രശ്നങ്ങളാണ് രവികുമാർ എഴുതുയ കഥയുടെ ഇതിവൃത്തം. നേരത്തെ രവികുമാർ ഫെഫ്കയിൽ പരാതി നൽകിയിരുന്നെങ്കിലും അന്നുണ്ടാക്കിയ നിബന്ധനകൾ പാലിക്കാൻ അണിയറപ്രവർത്തകർ തയ്യാറില്ല. കഥയുടെ പകർപ്പവകാശവും പ്രതിഫലവും രവികുമാറിന് നൽകണമെന്നായിരുന്നു ഫെഫ്‌ക വിധിച്ചത്. അത് പാലിക്കാതെ വന്നതോടെയാണ് രവികുമാർ കോടതിയെ സമീപിച്ചത്.