മഞ്ജു വാര്യരെ നായികയാക്കി സാജിത് യഹ്യ സംവിധാനം ചെയ്യുന്ന മോഹന്‍ലാല്‍ എന്ന ചിത്രത്തിന് പ്രദര്‍ശന വിലക്ക്. തൃശൂര്‍ അതിവേഗ കോടതിയാണ് ചിത്രത്തിന്‍റെ പ്രദര്‍ശനം സ്റ്റേ ചെയ്തിരിക്കുന്നത്. തിരക്കഥാകൃത്ത് കലവൂര്‍ രവികുമാര്‍ നല്‍കിയ ഹര്‍ജി പരിഗണിച്ചാണ് നടപടി. താന്‍ രചിച്ച 'മോഹന്‍ലാലിനെ എനിക്കിപ്പോള്‍ ഭയങ്കര പേടിയാണ്' എന്ന കഥാസമാഹാരത്തെ അനുകരിച്ചാണ് ചിത്രത്തിന്‍റെ തിരക്കഥ ഒരുക്കിയിരിക്കുന്നത് എന്ന് ചൂണ്ടിക്കാട്ടിയാണ് ഇതേ പരാതി തന്നെ രവികുമാര്‍ മുൻപ് ഫെഫകയ്ക്ക് മുന്നിലും ഉന്നയിച്ചിരുന്നു. കഥയുടെ പകർപ്പവകാശവും പ്രതിഫലവും നൽകണം എന്ന ഫെഫ്കയുടെ വിധി കോടതി മാനിക്കാൻ കൂട്ടാക്കിയില്ല. ഇതിനെ തുടർന്നാണു കലവൂർ രവികുമാർ തൃശൂർ ജില്ലാകോടതിയെ സമീപിച്ചത്. പകർപ്പവകാശ നിയമ പ്രകാരമാണു കേസ് നൽകിയത്.ചിത്രത്തിൽ നിന്ന് ലഭിക്കുന്ന വരുമാനത്തിന്‍റെ 25 ശതമാനം നഷ്ട പരിഹാരമായി കിട്ടണമെന്നാണ് ആവശ്യം.
സുനീഷ് വാരനാടാണ് ചിത്രത്തിനായി തിരക്കഥ രചിച്ചിരിക്കുന്നത്. മഞ്ജു വാര്യര്‍ ചിത്രത്തിൽ മീനുക്കുട്ടി എന്ന ഒരു കടുത്ത മോഹൻലാൽ ആരാധികയായാണ് എത്തുന്നത്. വിഷു റിലീസായിട്ടാണു ചിത്രം പുറത്തിറങ്ങാനിരുന്നത്. ഇന്ദ്രജിത്താണ് ചിത്രത്തിലെ നായകൻ.
Mobile AppDownload Get Updated News