ആ മഹാനടന്റെ നടനവിസ്മയങ്ങള്‍ അനുനിമിഷം എന്നെ അത്ഭുതപ്പെടുത്തിക്കൊണ്ടേയിരിക്കുന്നു' ലാലിനോടൊപ്പമുള്ള വര്‍ക്കിംഗ് എക്‌സ്പീരിയന്‍സിനെക്കുറിച്ച് ചോദിച്ചപ്പോഴാണ് ജിബു മനസ്സ് തുറന്നത്. 'അനുഭവപരിജ്ഞാനത്തില്‍ എന്നെക്കാള്‍ എത്രയോ ഉയരങ്ങളിലാണ് ലാലേട്ടന്‍. പക്ഷേ അതൊന്നും ക്യാമറയ്ക്ക് മുന്നില്‍ അദ്ദേഹം പ്രകടമാക്കാറില്ല. സംവിധായകന്റെ തീരുമാനങ്ങളാണ് അദ്ദേഹത്തിന് അന്തിമവാക്ക്. എന്നില്‍ നിന്ന് വേണ്ടതെല്ലാം ഞാന്‍ തരുന്നു. അതില്‍നിന്ന് ഇഷ്ടമുള്ളത് നിങ്ങള്‍ക്ക് തെരഞ്ഞെടുക്കാം. അതാണ് ലാലേട്ടന്റെ നിലപാട്.
ഇങ്ങനെയൊരു നടനെ ഞാനെവിടെയും കണ്ടിട്ടില്ല' മോഹന്‍ലാലിനെ നായകനാക്കി ജിബു ജേക്കബ്ബ് ഒരുക്കുന്ന ഇനിയും പേരിടാത്ത ചിത്രത്തിന്റെ ഷൂട്ടിംഗ് കോഴിക്കോട് ബിലാത്തിക്കുളം കേശവമേനോന്‍ നഗര്‍ ഹൗസിംഗ് കോളനിയില്‍ പുരോഗമിക്കുന്നതിനിടെ വീണുകിട്ടിയ ഇടവേളയിലാണ് ജിബു, ലാലെന്ന നടന്റെ വ്യക്തിവൈശിഷ്ട്യങ്ങളെ ഓര്‍ത്തെടുത്തത്. 'ലാലേട്ടനോടൊപ്പമുള്ള എന്റെ ആദ്യചിത്രമാണിത്. പക്ഷേ ഞാന്‍ അസിസ്റ്റന്റായിരുന്ന കാലത്ത്(ക്യാമറാമാന്‍ സാലു കെ. ജോര്‍ജ്ജിന്റെ അസിസ്റ്റന്റായിട്ടായിരുന്നു ജിബുവിന്റെ തുടക്കം) ലാലേട്ടന്റെ ഒന്നുരണ്ട് ചിത്രങ്ങളില്‍ വര്‍ക്ക് ചെയ്തിട്ടുണ്ട്.
ആദ്യചിത്രം മാന്ത്രികമായിരുന്നു. ഏറ്റവുമൊടുവില്‍ ഛോട്ടാമുംബയ്‌യ്ക്കുവേണ്ടിയും ക്ലാഷ് വര്‍ക്ക് ചെയ്തു. അതിലെ ചെട്ടികുളങ്ങര ഭരണിനാളില്‍ എന്ന് തുടങ്ങുന്ന ഗാനരംഗത്തിന്റെ പല ഭാഗങ്ങളും ഷൂട്ട് ചെയ്തത് ഞാനായിരുന്നു.' ജിബു തുടര്‍ന്നു. 'ലാലേട്ടനോടൊപ്പം വര്‍ക്ക് ചെയ്യാന്‍ വളരെ കംഫര്‍ട്ടാണ്. നമുക്ക് എന്ത് വേണമെങ്കിലും അദ്ദേഹത്തോട് ആവശ്യപ്പെടാം. എത്ര ടേക്ക് വേണമെങ്കിലും പോകാം. ടേക്കിന് പോകുന്നത് അദ്ദേഹത്തിന്റെ വീഴ്ച കൊണ്ടാവില്ല. ഏതെങ്കിലും സാങ്കേതിക പ്രശ്‌നമാകാം. പക്ഷേ അതൊന്നും അദ്ദേഹത്തെ അസ്വസ്ഥപ്പെടുത്തുന്നതായി തോന്നിയിട്ടില്ല.
ആദ്യമൊക്കെ ക്യാമറയ്ക്ക് മുന്നില്‍ നിന്ന് അദ്ദേഹം അഭിനയിക്കുന്നത് കാണുമ്പോള്‍ ഒരല്‍പ്പം കുറഞ്ഞുപോയില്ലേ എന്നെനിക്ക് തോന്നിയിട്ടുണ്ട്. ഇക്കാര്യം ലാലേട്ടനോട് പറഞ്ഞപ്പോള്‍ മോണിട്ടറില്‍ കണ്ടുനോക്കൂ എന്നിട്ട് ശരിയായില്ലെങ്കില്‍ നമുക്ക് വീണ്ടും ചെയ്യാം എന്നായിരുന്നു മറുപടി. മോണിട്ടറില്‍ കണ്ടപ്പോള്‍ അതേറ്റവും കൃത്യമായിരുന്നു. അതാണ് ലാല്‍ എന്ന നടന്‍' ജിബു പറയുന്നു.
Mobile AppDownload Get Updated News