സലിം കുമാറിന്‍റെ പ്രസ്താവനക്കെതിരെ ഭാഗ്യലക്ഷ്‌മി

ആക്രമണത്തിന് ഇരയായ നടിയെ നുണ പരിശോധനക്ക് വിധേയയാക്കണമെന്ന സലിം കുമാറിന്‍റെ അഭിപ്രായത്തിനെതിരെ ആഞ്ഞടിച്ച് ‍‍ഡബ്ബിംഗ് ആര്‍ട്ടിസ്റ്റ് ഭാഗ്യലക്ഷ്‌മി. നുണപരിശോധനയിൽ അന്ന് അനുഭവിച്ച പീഡനം വീണ്ടും അവൾ വിശദീകരിക്കുന്നത് കേട്ട് ആസ്വദിക്കാനാണോ സലിം കുമാർ അങ്ങനെ പറഞ്ഞതെന്ന് ഭാഗ്യലക്ഷ്‌മി ചോദിക്കുന്നു.

ഇത്ര നീചമായി സലിം കുമാറിന് എങ്ങനെ അഭിപ്രായം പറയാൻ കഴിയുന്നുവെന്നും ഭാഗ്യലക്ഷ്‌മി ചോദിക്കുന്നു. മലയാളസിനിമയിലെ സ്ത്രീകൾക്കായി തുടങ്ങിയ സംഘടനയെയും ഭാഗ്യലക്ഷ്‌മി വിമർശിക്കുന്നു. സലിം കുമാർ നടത്തിയ പ്രസ്താവനയോട് സംഘടന എന്ത് കൊണ്ട് പ്രതികരിച്ചില്ല എന്ന് ഭാഗ്യലക്ഷ്‌മി തന്‍റെ പോസ്റ്റിലൂടെ ചോദിക്കുന്നു.

പോസ്റ്റിന്‍റെ പൂര്‍ണരൂപം: ഒരു സിനിമയുടെ ഷൂട്ടിങ് തിരക്കായത്കൊണ്ടും ആ സ്ഥലത്ത് തീരെ കവറേജ് ഇല്ലാത്തത്കൊണ്ടും രാവിലെ ഏഴുമണിക്ക് പോവുകയും രാത്രി 10 മണിക്ക് മുറിയിൽ എത്തുകയും ചെയ്യുമ്പോൾ മാത്രമാണ് വാർത്തകൾ അറിയുന്നത്..ഏറ്റവും ദുഖം തോന്നിയത് നടൻ സലീം കുമാറിന്റെ പ്രസ്താവനയാണ്..ആ പെൺകുട്ടി അന്ന് രാത്രി കാറിൽ ആ നാല് നരജന്മങ്ങളുടെയിടയിൽ അനുഭവിച്ച വേദനയും അപമാനവും ഭീതിയും മനസ്സാക്ഷിയുളള ഒരാളും മറക്കില്ല.ആ വേദന ഒരു പെൺകുട്ടിയുടെ അച്ഛന്റെ സ്ഥാനത്ത് നിൽക്കുന്നവർക്കേ മനസിലാവൂ.

എങ്ങിനെയാണ് താങ്കൾക്ക് ഇത്തരത്തിൽ നീചമായി അഭിപ്രായം പറയാൻ സാധിച്ചത്..?..പെൺമക്കളെക്കുറിച്ച് ഓർത്തില്ലേ സലീം കുമാർ?അതോ അന്ന് ആ പെൺകുട്ടി അനുഭവിച്ചത് പോരാ എന്ന് തോന്നിയോ താങ്കൾക്ക്?..നുണപരിശോധനയിലൂടെ ഇനിയും അവളാ പീഡനം ആവർത്തിക്കുന്നത് താങ്കൾക്ക് കേട്ട് ആസ്വദിക്കണമായിരുന്നോ? വല്ലാത്ത ക്രൂരമായിരുന്നു ആ പ്രസ്താവന.

വൈകിയാണെങ്കിലും താങ്കളാ പോസ്റ്റ് ഡിലീറ്റ് ചെയ്തത്, ഖേദം തോന്നിയിട്ടൊന്നുമായിരിക്കില്ല..സമൂഹത്തിന്റേയും
മാധ്യമങ്ങളുടെയും വിമർശനം ഭയന്ന് തന്നെയാണ്..എന്തിന്റെ പേരിലായാലും മായ്ച്ചതിൽ സന്തോഷം..
ഇവിടെ മലയാള സിനിമയിൽ ഒരു സ്ത്രീ സംഘടന ഉണ്ടാക്കിയവരിൽ ആരും അറിഞ്ഞില്ലേ ഇദ്ദേഹത്തിന്റെ ഈ നല്ല വാക്കുകൾ.? നിങ്ങൾക്ക് തോന്നുന്ന കാര്യത്തിന് മാത്രമേ പ്രതികരിക്കൂ എന്നാണോ സംഘടനാ തീരുമാനം?..Women collective ആണോ Women Selective ആണോ...



Bhagyalakshmi bursts out against Salim Kumar

Bhagyalakshmi in her facebook post furiously bursts out against Salim Kumar's comment