ആലപോറൻ തമിഴൻ
കോളിവുഡിൽ വിവാദത്തിരമാലയായി വീശിയടിച്ച മെര്‍സൽ എന്ന ചിത്രത്തിലെ ഗാനമാണ് കോളിവുഡിലെ കഴിഞ്ഞവര്‍ഷത്തെ ആദ്യ പത്ത് മികച്ച ഗാനങ്ങളുടെ പട്ടികയിലെ ഒന്നാമൻ. ഇളയദളപതി വിജയ്‍‍യെ നായകനാക്കി അറ്റ്ലീ ഒരുക്കിയ ചിത്രത്തിലെ ആലപോറൻ തമിഴൻ എന്ന ഗാനമാണ് മുൻപന്തിയിലെ താരം. എആര്‍ റഹ്മാൻ സംഗീതം പകര്‍ന്നിരിക്കുന്ന ഈ ഗാനം ആലപിച്ചിരിക്കുന്നത് കൈലാഷ് ഖേര്‍, സത്യ പ്രകാശ്, ദീപക്, പൂജ എവി എന്നിവര്‍ ചേര്‍ന്നാണ്.
യാവനാ..
സത്യ എന്ന ചിത്രത്തിലെ യാവനാ എന്ന ഗാനമാണ് തൊട്ടുപിന്നാലെയുള്ളത്. ഗാനത്തിന്‍റെ വരികൾ ഒരുക്കിയിരിക്കുന്നത് മദൻ കർക്കിയാണ്. സൈമൺ കെ. കിങാണ് മാസ്മരിക സംഗീതം സ‍ഷ്ടിച്ചിരിക്കുന്നത്. സിബി സത്യരാജിനൊപ്പം മലയാളി താരം രമ്യ നമ്പീശൻ നായികയാകുന്ന ചിത്രമാണ് സത്യ. ഗാനം ആലപിച്ചിരിക്കുന്നത് മലയാളി കൂടിയായ കല്യാണി നായരും യാസിൻ നിസാറും ചേർന്നാണ്. രമ്യയും യാസിനും ചേർന്നൊരുക്കിയ ഗാനത്തിന്‍റെ കവർ പതിപ്പും ശ്രദ്ധേയമാണ്.
ഇരൈവാ...
ഫഹദ് ഫാസിലിന്‍റെ തമിഴ് അരങ്ങേറ്റ ചിത്രമായ വൈലൈക്കാരനിലെ ഗാനമാണ് അടുത്തത്. നയൻതാരയും ശിവകാര്‍ത്തികേയനും നായികയും നായകനുമാകുന്ന ചിത്രത്തിലെ ഇരൈവാ എന്ന ഗാനവും ഏറെ ആസ്വാദകരെ നേടി. അനിരുദ്ധ് രവിചന്ദ്രനാണ് ഗാനത്തിന് ഈണം പകര്‍ന്നിരിക്കുന്നത്. ജോനിദ ഗാന്ധിയും അനിരുദ്ധും ചേർന്നാണ് ഗാനം ആലപിച്ചിരിക്കുന്നത്.
മറുവാര്‍ത്തൈ...
ധനുഷിനെ നായകനാക്കി ഗൗതം വാസുദേവ് മേനോൻ സംവിധാനം ചെയ്യുന്ന 'എന്നെ നോക്കി പായും തോട്ടാ’യിലെ മറുവാര്‍ത്തെ... എന്ന് തുടങ്ങുന്ന ഗാനമാണ് അടുത്തതായി പട്ടികയിൽ ഇടം നേടിയിരിക്കുന്നത്. പ്രൊഡക്ഷൻ ജോലികൾ മാത്രം പുരോഗമിക്കുന്ന ചിത്രത്തിലെ ഗാനം പ്രൊമോഷന്‍റെ ഭാഗമായാണ് പുറത്ത് വിട്ടത്. താമരയുടെ വരികൾക്ക് ദര്‍ബുകാ ശിവ സംഗീതം പകര്‍ന്നിരിക്കുന്നു. സിദ്ധ് ശ്രീറാമാണ് ഗാനം ആലപിച്ചിരിക്കുന്നത്.
തലൈ വിടുതലൈ..
തല അജിത്തിനെ നായകനാക്കി ശിവ സംവിധാനം ചെയ്ത വിവേകം എന്ന ചിത്രത്തിലെ തലൈ വിടുതലൈ എന്ന് തുടങ്ങുന്ന ഗാനമാണ് അടുത്തത്. അനിരുദ്ധാണ് ഗാനത്തിന് സംഗീതം പകര്‍ന്നിരിക്കുന്നത്. സംവിധായകൻ ശിവ തന്നെയാണ് ഗാനം എഴുതിയിരിക്കുന്നത്. അനിരുദ്ധ്, ഹരീഷ് സ്വാമിനാഥൻ, നിവാസ്, ദീപക്, സന്തോഷ് എന്നിവരാണ് ഗാനം ആലപിച്ചിരിക്കുന്നത്.
വാടീ വാടി...
അബ്ബാസ് അഖ്ബര്‍ സംവിധാനം ചെയ്ത ചെന്നൈ ടു സിംഗപ്പൂര്‍ എന്ന ചിത്രത്തിലെ വാടീ വാടി എന്ന് തുടങ്ങുന്ന ഗാനമാണ് അടുത്തത്. സൗന്ദരാ രാജന്‍റെ വരികൾക്ക് ഗിബ്രാൻ ഈണം പകര്‍ന്നിരിക്കുന്നു. രാജൻ ചെല്ല്യ ആണ് ഗാനം ആലപിച്ചിരിക്കുന്നത്. ഗോകുൽ ആനന്ദും അഞ്ചു കുര്യനുമാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിച്ചിരിക്കുന്നത്.
യാഞ്ചി..
പോയ വര്‍ഷം ഏറെ പ്രശംസകളേറ്റുവാങ്ങിയ വിക്ര വേദയിലെ യാഞ്ചി എന്ന ഗാനവും ഏറെ സംഗീത പ്രേമികളുടെ മനം കവര്‍ന്നു. വിജയ് സേതുപതിയും മാധവനും ഒന്നിച്ചഭിനയിച്ച ചിത്രത്തിലെ ഈ ഗാനം ആലപിച്ചിരിക്കുന്നത് സംഗീതസംവിധായകൻ അനിരുദ്ധ് രവിചന്ദ്രനും ശക്തിശ്രീ ഗോപാലനും ചേർന്നാണ്. മോഹൻരാജിജാണ് ഗാനത്തിന് വരികൾ രചിച്ചിരിക്കുന്നത്. സാം സി.എസ്. എന്ന യുവ സംഗീത സംവിധായകനാണ് ഈ ഗാനത്തിന് ഈണം പകര്‍ന്നിരിക്കുന്നത്.
എന്ന നടന്താലും...
‘മീസയാ മുറുക്ക്’ എന്ന ചിത്രത്തിലെ എന്ന നടന്താലും എന്ന ഗാനമാണ് തൊട്ടടുത്തത്. ആദിത്യ ആദി വെങ്കിടപതിയും ആർ. ജീവയും ഒരു സിനിമയുടെ എല്ലാ മേഖലയിലും കൈവെക്കുന്ന ചിത്രമാണിത്. അഭിനയം, കഥ, സംഗീത, സംവിധാനം, ഗാനരചന, ആലാപനം തുടങ്ങിയ എല്ലാ മേഖലയിലും ഇരുവരുടെയും കൈകൾ എത്തിയിട്ടുണ്ട്. ആദിയും ജീവയും ചേർന്നെഴുതി സംഗീതം നൽകിയ ഗാനം ഇവര്‍ തന്നെയാണ് ആലപിച്ചിരിക്കുന്നത്.
അഴകിയേ...
കാര്‍ത്തിയെ നായകനാക്കി മണിരത്നം സംവിധാനം ചെയ്യുന്ന കാട്രു വെളിയിടെയ് എന്ന ചിത്രത്തിലെ അഴകിയേ എന്ന ഗാനമാണ് അടുത്തതായി പട്ടികയിലുള്ളത്. അതിഥി റാവുവാണ് നായിക. വൈരമുത്തുവിന്‍റെ മകന്‍ മാധവന്‍ കാര്‍ക്കി എഴുതിയ വരികള്‍ക്ക് എ. ആര്‍ റഹ്മാനാണ് സംഗീതം നല്‍കിയത്. അര്‍ജുന്‍ ചാണ്ടി, ജോണിതാ ഗാന്ധി എന്നിവരാണ് ആലപിച്ചത്.
അഡ്രസ് സോങ്
മേയാഥ മാനിലെ അഡ്രസ് ഗാനമാണ് ഒടുവിലായി പട്ടികയിലുള്ളത്. നവാഗതനായ രത്ന കുമാര്‍ അണിയിച്ചൊരുക്കുന്ന ചിത്രത്തിൽ വൈഭവ്, പ്രിയ എന്നിവരാണ് മുഖ്യ കഥാപാത്രത്തെ അവതരിപ്പിച്ചിരിക്കുന്നത്. രത്നകുമാറും വിവേകും ചേര്‍ന്നെഴുതിയ ഗാനങ്ങൾക്ക് സംഗീതം നിര്‍വഹിച്ചിരിക്കുന്നത് സന്തോഷ് നാരായണനാണ്. ആലപിച്ചിരിക്കുന്നതും സന്തോഷ് നാരായണൻ തന്നെ.
Mobile AppDownload Get Updated News